Knattspyrnusamband Íslands leitar nú að nýjum þjálfara fyrir bæði A-landslið kvenna og karla. Jón Þór Hauksson sagði starfi sínu lausu í gær og Erik Hamren lét af störfum í nóvember með karlaliðið.
Í karlaflokki er óvíst er hver tekur við en Arnar Þór Viðarsson, Lars Lagerback og fleiri hafa verið orðaðir við starfið.
Hjá stelpunum er Þorsteinn Halldórsson þjálfari Breiðabliks mest nefndur til sögunnar en Elísabet Gunnarsdóttir hefur einnig verið nefnd. Elísabet hefur unnið magnað starf í Svíþjóð og myndi teljast sem afar hæfur kostur í starfið.
Valtýr Björn Valtýsson útvarpsmaður og fréttamaður til margra ára segist hins vegar ekki sjá Elísabetu taka til starfa, ástæðan sé sú að hún og Sara Björk Gunnarsdóttir séu ekki vinkonur.
„Krummi gaukaði því að mér og það er sagan á götunni að Elísabet verði ekki þjálfari á meðan Sara er þarna inni. Hann (Heimildarmaðurinn) sagðist hafa heyrt að þær væru ekki vinkonur,“ sagði Valtýr Björn í þætti sínum í dag, Mín Skoðun.
