Lára Clausen segir í samtali við Vísi að hún samgleðjist knattspyrnumanninum Phil Foden innilega eftir endurkomu hans í enska landsliðið. Lára rataði í fjölmiðla um allan heim í september eftir að hún og Nadía Sif vinkona hennar heimsóttu Foden og Mason Greenwood á Hótel Sögu.

Þeir Greenwood og Foden brutu sóttvarnarreglur með heimsókninni og misstu í kjölfarið sæti sitt í enska landsliðinu. Foden hefur þó nú fengið að spila aftur og er Lára ánægð með það. „Það er bara gott að ferillinn sé kominn aftur á uppleið hjá honum og maður hafi ekki eyðilagt meira fyrir honum,“ segir Lára við Vísi en henni fannst tekið virkilega hart á þeim Foden og Greenwood.

„Mjög ósanngjörn umfjöllun. Við fengum alveg að finna fyrir þessu líka en það var tekið harðara á þeim. Það var mjög erfitt að horfa upp á þá missa eitthvað sem þeir voru búnir að vinna svo mikið fyrir. Þeir voru kallaðir heimskir og ég veit ekki hvað og það fannst mér ömurlegt að lesa.“

Eins og áður segir vakti heimsókn Láru og Nadíu mikla athygli en eftir hana fóru þær í viðtöl við stærstu fjölmiðla Bretlands. Lára fór í viðtal við DailyMail og sagði þar frá því sem hafði gerst þessa örlagaríku nótt. ,,Það var gott að kyssa hann,“ var meðal þess sem Lára sagði í viðtalinu en þar var greint frá því að hún og Foden hefðu stundað kynlíf saman.