Paul Joyce blaðamaður hjá The Times segir að Carlo Ancelotti stjóri Everton sé með ellefu leikmenn til sölu til að minnka hóp sinn.

Everton mun þó ekki selja ellefu leikmenn en einhverjir af þeim fara áður en félagaskiptaglugginn lokar.

Joyce sem er oft sagður best tengdi blaðamaðurinn í Bítlaborginni segir að Gylfi Þór Sigurðsson sé einn af þeim sem er til sölu komi tilboð í hann.

Aðrir leikmenn eru Fabian Delph, Theo Walcott, Bernard, Alex Iwobi, Yannick Bolasie, Muhamed Besic og Sandro Ramírez.

Gylfi byrjaði fyrsta deildarleik tímabilsins á bekknum en skoraði og lagði upp í sigri liðsins á Salford í deildarbikarnum í gær. Gylfi er að hefja sitt fjórða tímabil hjá Everton.

Gylfi varð dýrasti leikmaður í sögu Everton þegar hann gekk í raðir félagsins árið 2017 en talið er að Everton hafi keypt hann á 45 milljónir punda.