Þór Akureyri hefur boðað það að allir sem koma að félaginu verði að lækka laun sín, vegna kórónuveirunnar.

Reimar Helgason framkvæmdastjóri Þórs segir að vissulega hafi veiran mjög mikil áhrif á rekstur og rekstrarplön knattspyrnudeildar.

„Þetta er strax farið að hitta okkur illa því að við náðum ekki að halda stór mót sem áttu að vera í mars og óvíst hvort eða hvenær hægt er að halda þessi mót,“ segir Reimar við vefsíðu Þórs.

,,Það yrði mjög mikið högg ofan í það að fyrirtæki haldi eðlilega að sér höndum í styrktarmálum. Við sjáum ekki hvað höggið verður mikið fyrr en við sjáum hvað þetta ástand varir lengi og hvenær við komumst af stað inn í sumarið. Það verður ekki komist hjá því að taka upp samninga sem knattspyrnudeildin hefur verið að gera fyrir komandi tímabil og ég held að allir átti sig á stöðunni; geri sér grein fyrir því að það verða allir að koma að borðinu og leggja sitt af mörkum. En það er ekki bara leikmenn og starfsmenn sem þurfa að gefa eitthvað eftir, við þurfum öll sem félag að standa upp og berjast fyrir félagið okkar og leggja eitthvað af mörkum. Við munum reyna að halda öllum vel upplýstum þegar við vitum meira um hve skaðinn verður mikill. Oft hefur verið þörf að standa saman en nú er nauðsyn á samstilltu átaki. Áfram Þór!“ sagði Reimar Helgason að lokum.

Fjöldi félaga hefur greint frá því að laun leikmanna verði lækkuð og búast má við að fjöldi þeirra aukist.