Víðir Reynisson, yfirlögregluþjón hefur beðist afsökunar á því að hafa sakað íþróttafélög um að halda úti æfingum á meðan samkomubann er í gangi. Svo virðist sem Víðir hafi farið með rangt mál.

Víðir gekk nokkuð hart fram á fréttamannafundi sínum í gær og sagði félög vera áfram með æfingar, hann hefur nú dregið í land.

Fjöldi félaga hefur hafnað því að halda úti æfingum og svo virðist sem félögin fari eftir settum reglum.

„Ég sagði strax í upphafi á þess Covid-19 verkefni að ég myndi gera mistök. Í dag gerði ég mistök. Ég hélt því fram að 4 íþróttafélög hefðu verið með æfingar. Það var rangt og ég biðst afsökunar á því. Fullt af góðu fólki sem fékk að heyra það í dag að óþörfu,“ skrifaði Víðir á Twitter í gær.

ÍSÍ hefur bannað allar íþróttaæfingar þangað til annað kemur í ljós en samkomubannið gildir fram í miðjan apríl.