Hörður Snævar Jónsson skrifar frá París:
Íslenska landsliðið kom til Parísar í gærkvöldi og mun síðdegis í dag æfa á Stade de France í úthverfi Parísar. Liðið leikur sov við heimamenn í undankeppni EM á morgun.
Íslenska liðið, vann góðan sigur á Andorra á föstudag og kemur til Parísar, þar sem stig eða sigur væru algjör bónus.
Hvort íslenska liðið komist í lokakeppni EM, stendur hvorki né fellur með því hvað gerist á morgun. Íslenska liðið hefur þó hins vegar oftar en ekki átt sína bestu leiki á erfiðum útivöllum, nægir að nefna sigra í Hollandi og Tyrklandi.
Hugo Lloris, fyrirliði Frakklands þekkir besta leikmann Íslands, Gylfa Þór Sigurðsson vel. Þeir léku saman í Tottenham í tvö ár en þar er Lloris ennþá.
,,Hann er vel þekktur í knattspyrnuheiminum, sérstaklega í ensku úrvalsdeildinni þar sem hann hefur gert frábæra hluti,“ sagði Lloris.
,,Hann hefur staðið sig vel með Tottenham, Swansea og Everton. Hann er lykilmaður í íslenska landsliðinu, hann tekur ábyrgð. Hann er leiðtogi. Frábær manneskja og leikmaður.“
,,Við verðum að passa vel upp á hann á morgun, hann er frábær í föstum leikatriðum. Bæði aukaspyrnum og fyrirgjöfum. Við verðum að passa hann.“
