Ísland mætir Andorra í undankeppni EM 2020 á Laugardalsvelli á mánudag. Um er að ræða seinni leikinn í leikvikunni sem nú stendur yfir, en íslenska liðið tapaði með eins marks mun gegn heimsmeisturum Frakka í Laugardalnum á föstudag, eins og kunnugt er. Staðan í riðlinum er þannig að Tyrkir og Frakkar eru með 18 stig, en Ísland með 12 stig.

Mikill breidd er í fremstu víglínu Íslands en Kolbeinn Sigþórsson, Alfreð Finnbogason, Jón Daði Böðvarsson og Viðar Örn Kjartansson eru í hópnum.

,,Það er gott að hafa möguleikana, það er þannig í lífinu en ekki bara í fótbolta, Við þurfum möguleikana, það voru kaflar á síðasta ári þar sem við vorum ekki með neina framherja. Ég man í mars eftir leik gegn Frakklandi þar sem við byrjuðum með Albert Guðmundsson og Gylfa frammi. Það er gott að hafa kostina sem við höfum núna, menn með mismunandi gæði og hæfileika. Við þurfum að velja hvað er best hverju sinni, við höfum möguleika á að breyta um kerfi. Spila með einn framherja og Gylfa fyrir aftan og spila með tvo framherja og Gylfa inni á miðsvæði,“ sagði Hamren.

Flestir telja að Hamren byrji með tvo framherja gegn Andorra á morgun. ,,Það kemur í ljós, það er gott að eiga möguleiki á því. Við gerðum það gegn Moldóvu og þú sérð það á morgun, kannski,“ sagði Hamren og glotti.

Kolbeinn Sigþórsson var frábær gegn Frakklandi, hann er heill heilsu. ,,Kolbeini leið vel í gær eftir leikinn, hann hefur farið vel með líkama sinn. Flestir leikmenn eru þreyttari, tveimur dögum eftir leik. Það verður ekki erfið æfing í dag, ég býst við að Kolbeinn geti byrjað.“