Tammy Abraham, sóknarmaður Chelsea missti af flugi liðsins til baka frá Norwich á laugardaginn. Ástæðan var sú að hann gat ekki pissað.
Abraham skoraði tvö mörk í 3-2 sigri Chelsea á Norwich um helgina, hann var kallaður í lyfjapróf eftir leik.
Framherjinn öflugi gat hins vegar ekki pissað, mikill hiti var í Norwich. Allur vökvi í líkama framherjans hafði gufað upp í átökunum.
Hann þurfti því að drekka og drekka eftir leik til að ná að pissa í glasið sem lyfjaeftirlitið vildi.
Flugvél með leikmenn Chelsea fór því á undan honum en starfsmenn Chelsea biðu eftir framherjanum, hann þurfti því að keyra aftur til Lundúna með starfsliðinu.
