,,Hvað er í gangi í Krikanum? Nákvæmlega ekki neitt, það er ekkert að gerast,“ sagði Kristján Óli Sigurðsson, sérfræðingur Dr Football um stöðu FH og hvað væri í gangi í Kaplakrika.
Davíð Þór Viðarsson, fyrirliði FH var ómyrkur í máli eftir tap FH gegn KR í Pepsi Max-deild karla í gær. FH tapaði þá á heimavelli og er staða liðsins slæm. FH er með 12 stig í deildinni, langt undir væntingum. Liðið er nú 11 stigum á eftir toppliði KR.
Fótbolti.net sagði frá því fyrir helgi að vandræði væru með launagreiðslur til leikmanna FH og að leikmenn hefðu í raun farið í verkfall, til að láta vita óánægju sinni. Morgunblaðið spurði Davíð út í málið. Hann sendi væna pillu á þá sem hafa rætt og ritað um málið. „Þetta er bara vitleysingar sem þurfa að tjá sig um allt og alla á Twitter og menn sem hafa mismikið vit á fótbolta. Það er gott að þeir hafi einhvern vettvang til að tjá sig,“ sagði Davíð Þór
Kristjáni svaraði þessum ummælum Davíðs í þætti dagsins í Dr. Football. ,,Davíð Þór Viðarsson tjáir sig, ef ég er vitleysingur. Ef Davíð þykist hafa vit á fótbolta sjálfur, þá hefði hann hætt fyrir tveimur árum. Hann er ekki skugginn af sjálfum sér, var frábær á sínum tíma. Mér fannst hann ekki frábær í gær, skokkaði um í miðju hringnum, reif kjaft og tuðaði,“ sagði Kristján í þætti dagsins.
,,Hann átti að hætta fyrir tveimur árum í stað þess að mjólka klúbbinn sinn að innan, svona er boltinn. Menn vilja salt í grautinn, ég skil það vel. Davíð er að kasta steinum úr glerhúsi.“
