Ólafur Kristjánsson, þjálfari FH, sá sína menn tapa 2-1 heima gegn KR í Pepsi Max-deild karla í dag.

FH spilaði alls ekki vel mest megnis af leiknum í kvöld og voru þá sérstaklega slappir í fyrri hálfleik.

,,Þetta var verðskuldaður sigur KR. Við vorum mjög slakir í fyrri hálfleik, við vorum eftir í návígum og spiluðum okkur ekki úr þeim stöðum sem komu upp,“ sagði Ólafur.

,,Það var einkennandi fyrir fyrri hálfleikinn að þeir voru á undan í öllum aðgerðum og við vorum kannski heppnir að vera bara 1-0 undir í hálfleik.“

,,Við lifnuðum við í seinni hálfleik en það er auðvelt að skora. Við þurfum að finna lausn á því af hverju andstæðingarnir þurfa ekki fleiri færi.“

,,Ég hef áhyggjur af því að við eigum í erfiðleikum með að vinna fótboltaleiki, hvort sem það séu 1,2,3 eða 4. Við erum ekki að gera nógu vel til að sækja sigra.“

Óli var svo spurður út í eigin framtíð og hvort að það væru krísufundir í gangi hjá FH þessa stundina.

FH er 11 stigum frá toppnum þessa stundina og veit hann sjálfur að það séu aldrei æviráðningar í knattspyrnu.

,,Ég held að formaðurinn hafi svarað því ágætlega. Staða okkar FH er ekki góð og ég er í brúnni en ég hef alltaf haft það þannig að það er þannig í fótboltanum að þú ert ekki með æviráðningu.“

,,Það eru hlutir sem maður má ekkert fara að hugsa um. Þú mætir bara inn næsta dag og vinnur vinnuna þína. Hér í FH reyna menn að leysa hlutina í sameiningu.“

,,Það er bara þannig þegar á móti blæs að þá eru það þeir sem eru sterkir á svellinu sem rísa upp, þola mótlætið, þola umtalið og þola það að það gangi ekki vel í augnablikinu.“