KR vann frábæran sigur í Pepsi Max-deild karla er liðið spilaði við ÍA á Akranesvelli í 8. umferð sumarsins.

Sigur KR var aldrei í hættu á Akranesi í kvöld og höfðu þeir svarthvítu betur sannfærandi, 3-1.

Hér má sjá það góða og slæma úr leiknum.

Plús:

KR-ingar voru frábærir í leiknum í dag. Leikskipulagið gekk alveg upp og var aginn til fyrirmyndar.

Þeir svarthvítu voru ekkert að flýta sér og voru með öll tök á leiknum nánast allar 90 mínúturnar. Eftir að hafa komist í 2-0 var sigurinn aldrei í hættu.

Finnur Tómas Pálmason er fæddur árið 2001 og er orðinn hlekkur í þessu KR liði. Gríðarlega skemmtilegur leikmaður sem á framtíðina fyrir sér.

Það áttu allir KR-ingar bara góðan dag á Akranesi. Liðið hefur unnið fjóra leiki í röð og er á toppi deildarinnar.

Jafnvel þegar staðan var 2-0 þá voru yfirburðir KR-inga miklir og þá sérstaklega undir lokin.

Mínus:

Það var eins og ÍA væri aldrei að reyna að komast aftur í leikinn. Um leið og þeir fengu boltann var oft spilað til baka og engin áfefð í spilamennskunni fyrr en of seint.

Tobias Thomsen fékk tvö dauðafæri í þessum leik en klikkaði á þeim báðum. Það seinna var ótrúlegt en hann fékk boltann beint fyrir framan mark ÍA en skaut framhjá. Sem betur fer fyrir hann þá tókst honum að skora að lokum.

Það vantaði svo mikið hjá ÍA í dag. Það var eins og leikmenn liðsins hefðu engin svör við KR-ingum. Er blaðran sprungin?

ÍA hefur nú tapað þremur leikjum í röð og spilamennskan í dag var líklega sú versta í allt sumar.