Lið Hauka í Inkasso-deild karla gaf út tilkynningu í kvöld þar sem greint er frá því að Kristján Ómar Björnsson sé hættur störfum.
Þetta kom fram í kvöld en Kristján segir óvænt upp störfum eftir aðeins fjóra deildarleiki í sumar.
Þróttur Reykjavík vann 4-2 útisigur á Haukum í gær og er það síðarnefnda með tvö stig í 11. sæti deildarinnar.
Aðstoðarmaður Kristjáns mun einnig láta af störfum sem og markmannsþjálfari liðsins.
Tilkynning Hauka:
Kristján Ómar Björnsson sem starfað hefur sem þjálfari meistaraflokks karla í fótbolta hjá Haukum hefur óskað eftir því að láta af störfum.
Stjórn knattspyrnudeildar Hauka hefur ákveðið að verða við ósk Kristjáns. Hilmar Trausti Arnarson sem gegnt hefur starfi aðstoðarþjálfara og Hólmsteinn Gauti Sigurðsson, markmannsþjálfari, láta einnig af störfum.
Búi Vilhjálmur Guðmundsson, þjálfari Knattspyrnufélagsins Ásvöllum sem er varalið Hauka, tekur tímabundið við þjálfun liðsins.
Stjórn knattspyrnudeildar Hauka þakkar þeim Kristjáni, Hilmari og Hólmsteini innilega fyrir frábært starf í þágu félagsins.