Frank de Boer er mjög umdeildur knattspyrnustjóri en hann starfar í dag fyrir lið Atlanta United í Bandaríkjunum.

De Boer tók við Atlanta fyrir þessa leiktíð en liðið varð meistari á síðasta tímabili og spilaði mjög vel.

Gengið undir De Boer hefur hins vegar verið slakt og situr Atlanta í neðsta sætinu í sinni deild með aðeins fimm stig eftir sex leiki.

Liðinu hefur þá einnig aðeins tekist að skora fimm mörk í sex leikjum og hefur fengið á sig átta.

Hollendingurinn náði flottum árangri með Ajax í heimalandinu og stýrði liðinu frá 2010 til 2016 og vann deildina fjórum sinnum.

Eftir þá dvöl hefur ekkert gengið hjá De Boer sem tók við Inter Milan á Ítalíu og svo síðar Crystal Palace á Englandi áður en hann hélt til Bandaríkjanna.

De Boer entist í starfi hjá Inter í aðeins 85 daga og var svo rekinn eftir tíu vikur hjá Palace eftir hörmulega byrjun.

Atlanta tapaði 2-1 heima gegn FC Dallas í gær og ef liðið fer ekki að ná í sigra þá gæti De Boer fengið sparkið enn eina ferðina eftir stutt stopp í starfi.