Hafi einhverjir talið mögulegt að Framsóknar- og Miðflokkurinn myndu sameinast aftur telja þeir sem til þekkja í flokkunum að slíkar vangaveltur séu nú endanlega úr sögunni.

Margir þeirra sem hættu stuðningi við Framsóknarflokkinn og stofnuðu Miðflokkinn litu ekki á Sigurð Inga sem höfuðandstæðing sinn heldur sem leiksopp flokkseigendafélagsins. Þeir sem hafi verið einna virkastir í að undirbúa flokksþingið og atburðina sem þar urðu hafi verið vinirnir Ásmundur Einar Daðason og Helgi Haukur Hauksson. Þeir hafa verið samstarfsmenn í viðskiptum til margra ára og eru nátengdir Kaupfélagi Skagfirðinga.

Miðflokksmenn segja Helga Hauk hafa verið leiðandi í að breyta kjörskrám flokksþingsins með þeim afleiðingum að fjölda stuðningsmanna Sigmundar Davíðs hafi verið vísað frá við kjörklefana. Einnig hafi hann hringt hundruð, frekar en tugi, símtala til að bera út gróusögur um Sigmund og sannfæra fólk um að kjósa Sigurð Inga.

Þegar ríkisstjórnin var mynduð grínaðist Gunnar Bragi Sveinsson, þingmaður Miðflokksins, með það á samfélagsmiðlum að Framsóknarflokkurinn þyrfti þrjú ráðherrasæti, eitt fyrir formann, eitt fyrir varaformann og eitt fyrir flokkseigandann.

Svo fór að Ásmundur Einar Daðason var gerður að félagsmálaráðherra, flestum konum í þingflokknum til mikillar armæðu. Nú er svo búið að ráða nýjan framkvæmdastjóra Framsóknarflokksins. Sá heitir Helgi Haukur Hauksson.