Vilhjálmur Bjarnason, þingmaður Sjálfstæðisflokksins, hefur ástæðu til að brosa út í annað þessa dagana, þó ekki komi það til af góðu. Vilhjálmur benti þegar árið 2006 á það að ómögulegt væri að þýski bankinn Hauck & Aufhäuser hefði verið raunverulegur kaupandi að hlut í Búnaðarbankanum.

Hlaut Vilhjálmur ekkert nema bágt fyrir á sínum tíma, var svarað með skætingi af ráðherrum og ríkisendurskoðun, sem ekkert vildu með athugasemdir hans hafa. Allt fram til þess að skýrsla rannsóknarnefndar Alþingis um aðkomu þýska bankans að kaupunum á Búnaðarbankanum var kynnt mátti Vilhjálmur þola háð og spott fyrir sinn málflutning. Það er gott að fá uppreisn æru og má samgleðjast Vilhjálmi með það.

Nú er að vona að Vilhjálmur, eða aðrir, þurfi aldrei aftur að halda út í samskonar vegferð.