„Þetta er rótgróið fjölskyldufyrirtæki sem leggur áherslu á mikla þjónustu. Mikið úrval af íslenskri skartgripahönnun er líka aðalsmerki okkar. Við fórum að auka mjög úrvalið af íslenskri hönnun í kringum 2009 en hún tók einmitt að blómstra á þeim tíma,“ segir Unnur Eir Björnsdóttir hjá Meba. Unnur er gullsmiður og hannar sjálf marga af þeim fallegu skartgripum sem Meba er með. Systir hennar, Eva Björnsdóttir, hannar einnig gripi í verslunum fyrirtækisins en einnig koma margir aðrir íslenskir gullsmiðir við sögu með sín verk.

„Hver og einn hönnuður hefur sinn persónulega stíl og samanlagt er þetta mjög breitt úrval af ólíkum skartgripum,“ segir Unnur og bætir við að verðbilið sé mjög breitt. „Það hefur alltaf verið okkar áhersla að bjóða á upp á vörur á mjög breiðu verðbili þannig að allir geta fundið eitthvað við hæfi hjá okkur, sama hver fjárráðin eða tilefnið eru.“

Meba á sér afar merka sögu en fyrirtækið fagnaði 70 ára afmæli í fyrra. Í dag eru verslanirnar tvær, önnur í Kringlunni en hin í Smáralind. Fyrirtækið var hins vegar stofnað á Barónsstígnum árið 1947 og hefur einnig í langri sögu sinni verið til húsa við Laugaveg.

Bæði afi og faðir Unnar voru úrsmiðir og stofnaði afinn fyrirtækið. Hét það upphaflega Magnús E. Baldvinsson – Úr og skartgripir, en við flutning fyrirtækisins í Kringluna var tekið upp nafnið Meba, það er sett saman úr nöfnum þáverandi aðaleigenda, afa og föður Unnar, þeirra Magnúsar Baldvinssonar og Björns Árna Ágústssonar.

Íslensk hönnun, góð þjónusta og breitt úrval eru helstu aðalsmerki Meba. „Á verkstæði okkar eru gullsmiðir, úrsmiðir og áletrunarþjónusta og reynum við að uppfylla óskir viðskiptavina okkar eins vel og við getum,“ segir Unnur.

Á myndum sem fylgja greininni má sjá nokkur sýnishorn af fjölbreyttri, íslenskri skartgripahönnun frá Meba.