Umræður um kjarasamninga voru áberandi í umræðum um stefnuræðu forsætisráðherra. Orðið „stöðugleiki“ bar á góma. Vandinn er hins vegar sá að stjórnmálamenn eiga erfiðan vetur í vændum. Verkalýðsleiðtogar hafa þegar boðað blóðugar aðgerðir og telst það ekki ólíklegt á þessum tímapunkti að árið 2019 verði verkfallsárið mikla. Nýjustu tölur Hagstofunnar sýna að meðallaun eru rúmar 700 þúsund krónur á meðan miðgildið er um 600 þúsund krónur. Gefur það til kynna að hæstu launin togi upp meðaltalið. Með slíkar upplýsingar í vopnabúrinu verður erfitt fyrir þá sem hafa milljón eða meira á mánuði að sannfæra almúgann um að samþykkja nokkra þúsundkalla í launahækkun. Slíkt mun án efa leiða til verðbólgu og frekari átaka á vinnumarkaði. Fyrir húsnæðiseigendur með verðtryggt lán er kannski ráð að skipta yfir í óverðtryggt lán. Við munum öll hvað gerðist síðast.