Um miðjan febrúar lést 15 ára piltur, Adam Buk frá Haslev í Danmörku, eftir að hann tók inn MDMA sem hann keypti af 17 ára pilti. Buk og vinur hans tóku efnið inn síðdegis þann 2. febrúar. Um kvöldið veiktust þeir og voru strax lagðir inn á sjúkrahúsið í Køge. Fljótlega varð ljóst að ástand Buk var mjög alvarlegt og var hann fluttur í skyndingu á Ríkissjúkrahúsið í Kaupmannahöfn. Honum var haldið sofandi í 13 daga en læknum tókst ekki að bjarga lífi hans og lést hann 15. febrúar. Vinur hans jafnaði sig hins vegar og fékk að fara heim daginn eftir að hann var fluttur á sjúkrahús.
Ákæruvaldið hefur nú ákært 17 ára pilt frá Næstved fyrir manndráp af gáleysi en hann seldi Buk og vini hans MDMA. Efnið var óvenjulega sterkt. Pilturinn hefur setið í gæsluvarðhaldi síðan í byrjun febrúar en þar sem hann hefur ekki náð 18 ára aldri má ekki vista hann í fangelsi og hefur hann því verið vistaður á lokaðri deild á vegum félagsmálayfirvalda.