Athafnamaðurinn Elon Musk hefur beðið breska kafarann Vern Unsworth formlega afsökunar eftir að hafa kallað hann barnaníðing á opinberum vettvangi.
Samkvæmt Musk voru ummælin látin falla í reiði og sá hann eftir þeim strax í kjölfarið. Hlutabréfaverðið í fyrirtækinu Tesla hrapaði um 3,5 prósent eftir barnaníðingsummælin.
Þessi orðaskipti milli Musk og Unsworth hófust þegar umræður voru í gangi um að koma taílensku fótboltadrengjunum til bjargar fyrr í þessum mánuði, en Unsworth spilaði stórt hlutverk í björgunaraðgerðunum.
Musk hafði fengið vísindamenn sína hjá Tesla til að útbúa sérsniðinn kafbát, en hann kom ekki að notum og þótti umfangsmikill og klunnalegur að mati kafarans.
Cave rescuer on Musk: “It was a PR stunt. It had no chance of working.” pic.twitter.com/uPgRMQLkRx
— Quoth the Raven (@QTRResearch) July 13, 2018
Unsworth sagði að Musk hefði fyrr mátt vita að kafbáturinn væri gagnslaus og kallaði forstjóra Teslu hreint athyglissjúkan. Musk var allt annað en sáttur með gagnrýnina sem hann fékk og sendi frá sér fjölmargar færslur á Twitter þar sem hann svaraði fyrir sig fullum hálsi með tístum.
Kafarinn segir í samtali við fréttamiðilinn Guardian að ummæli Musk væru ekki aðeins árás á sig, heldur björgunaraðgerðina eins og hún leggur sig. „Ég heyrði að hann hefði kallað mig barnaníðing,“ segir hann. „Mig grunar að fólk átti sig á því hverslags maður hann er.“
Aðspurður um hvort hann ætli sér að leita réttar síns svaraði Unsworth játandi og bætti við að þessu væri ekki lokið.