Talsverður erill var hjá lögreglunni á höfuðborgarsvæðinu í gærkvöldi og í nótt þar sem helst stóð upp úr mikill fjöldi ökumanna sem staðinn var að akstri undir áhrifum áfengis eða fíkniefna.
Rétt fyrir klukkan fimm í morgun var maður handtekinn í Austurstræti. Sá hafði ekki farið að fyrirmælum lögreglu og er grunaður um eignaspjöll, skemmdi maðurinn lögreglubifreið, að því er fram kemur í dagbók lögreglu. Maðurinn var vistaður í fangageymslu.
Þá handtók lögregla mann í annarlegu ástandi við Álfheima um miðnætti þar sem hann var að stofna til slagsmála. Maðurinn var vistaður í fangageymslu lögreglu vegna ástands síns.
Eins og að framan greinir hafði lögregla afskipti af fjölmörgum ökumönnum sem ýmist eru grunaðir um akstur undir áhrifum áfengis eða fíkniefna, minnst tíu talsins.