Breski sjónvarpsmaðurinn Paul O‘Grady var hætt kominn fyrir skemmstu eftir að hafa tekið upp þátt um flækingshunda á götum Indlands. Paul, sem er 62 ára, hefur gengið í gegnum ýmislegt í gegnum tíðina og meðal annars fengið hjartaáfall í þrígang.
Í þáttunum heimsótti Paul götur Delí á Indlandi þar sem þúsundir flækingshunda voru viðfangsefnið. Hann heimsótti athvarf fyrir hundana sem margir hverjir glíma við veikindi eftir mörg ár á götunni.
Paul fékk í sig hættulega sýkingu eftir að hafa leikið við flækingshunda í umræddu athvarfi. „Þetta var engum nema mér að kenna. Mér var sagt að halda mig fjarri þeim en ég lá ofan í holræsunum með þeim,“ segir Paul við breska blaðið Mirror og bætir við að hann hafi gefið þeim að borða úr höndunum og hreinsað orma úr sárum þeirra með berum höndunum.
Einhver óværa virðist hafa komist í hann með fyrrgreindum afleiðingum.
Allt byrjaði þetta með hrikalegum uppköstum klukkan fimm að morgni dag einn fyrir skemmstu. Þegar klukkan var orðin tíu að kvöldi, sautján tímum síðar, var Paul enn fastur við klósettskálina og þá ákvað hann að fara til læknis. Hann var lagður inn og eftir rannsóknir sáu læknar að líkami hans var ekki langt frá því að gefa upp öndina. Líffærin voru farin að gefa sig en sem betur fer náði hann sér á strik. Það tók hann þó nokkra daga og talsvert magn af sýklalyfjum að komast á fætur að nýju.
Þættirnir sem Paul var að vinna að heita For the Love of Dogs in India og segja þeir, eins og nafnið gefur til kynna, frá þeim fjölmörgu flækingshundum sem búa á götum Indlands. Paul hefur lengi látið sig velferð dýra varða og hefur hann ferðast um öll heimsins horn í þeim tilgangi. Sjálfur segir Paul að hann hafi aldrei veikst jafn hastarlega og í þetta umrætt skipti og það komi honum þó nokkuð á óvart. „Ég er mest hissa að hafa aldrei fengið hundaæði,“ segir hann.
Þrátt fyrir þessa reynslu sína af Indlandi segist hann gjarnan vilja koma þangað aftur. Hann segir að Delí sé borg mikilla öfga, sérstaklega hvað varðar skiptingu auðs. „Þú finnur mjög ríkt fólk þarna, stórkostleg hótel og ótrúleg heimili. Svo sérðu fátækt sem þú myndir aldrei trúa að væri til,“ segir hann.