Í júlí á síðasta ári tók eigandi sumarhúss á Borgundarhólmi eftir því að hringlótt gat var á þakinu á sumarhúsinu. Eigandinn skoðaði málið að sjálfsögðu betur og fann þá dökkan stein inni í húsinu. Hann tók steininn og henti honum út í garð. En þegar hann sagði eiginkonu sinni frá þessu lét hún manninn finna steininn á nýjan leik og senda til rannsókna á danska náttúrufræðisafninu hjá Kaupmannahafnarháskóla.

Þetta kemur fram í fréttatilkynningu frá Kaupmannahafnarháskóla. Þar segir að rannsóknir hafi leitt í ljós að um loftstein var að ræða og hefur hann hlotið nafnið Dueodde-loftsteinninn (Dueodde-meteoritten).

Loftsteinninn er 75 grömm. Fjölmargir vísindamenn hafa rannsakað hann og er niðurstaða rannsóknanna að um sé að ræða loftstein úr málmi og grjóti en um 80 prósent loftsteina, sem hafa fundist á jörðinni, eru svipaðir af samsetningu.

Eigandi sumarhússins fékk 14.000 danskar krónur í fundarlaun sem verður að teljast ágætis kílóverð. Loftsteinninn verður til sýnis á jarðfræðisafninu í Kaupmannahöfn frá og með deginum í dag.