Þegar einhver gefur þér hornauga í búðinni næst þegar þú skellir plastpoka á afgreiðsluborðið er engin ástæða til að skammast sín. Niðurstöður nýrrar rannsóknar sýna að plastpokar eru betri fyrir umhverfið en taupokar. Þetta er eflaust niðurstaða sem kemur mörgum á óvart.

Rannsóknin var framkvæmd af vísindamönnum við DTU (danska tækniháskólann) en verkkaupin var danska umhverfisstofnunin. Í fréttatilkynningu frá umhverfisstofnuninni kemur fram að plastpokar séu miklu minna íþyngjandi fyrir náttúruna en taupokar. Skýringin á þessu er að bómull er notuð við framleiðslu á taupokum og það er ræktunin á bómullinni sem gerir taupokana síður umhverfisvænni en plastpokana. Við bómullarrækt þarf að nota stór landsvæði og ræktunin krefst mikillar auðlindanotkunar.

Rannsóknin heitir Life Cycle Assesment of grocery carrier bags. Niðurstaða hennar er að það þarf að nota pappírspoka 40 sinnum áður en hann er betri kostur fyrir umhverfið en plastpoki. Það þarf að nota taupoka úr bómull 7.100 sinnum áður en hann er betri kostur en plastpoki og ef bómullin er lífræn þarf að nota pokann 20.000 sinnum til að hann sé betri kostur en plastpoki.

Umhverfisstofnunin segir að ef fólk eigi nú þegar taupoka eða poka úr öðrum efnum en plasti þá sé góð hugmynd að nota þá eins lengi og þeir duga. Það sé gott fyrir umhverfið að nota hvern burðarpoka eins oft og hægt er, óháð því úr hverju hann er gerður.