Laun félagsmanna aðildarfélaga BSRB sem starfa hjá ríkinu verða hækkuð um 1,3 prósent að meðaltali til að bæta þeim upp launaskrið á almennum vinnumarkaði. Hækkunin er afturvirk frá 1. janúar 2017 og ætti að koma til framkvæmdar um næstu mánaðarmót hjá félagsmönnum, þar á meðal félagsmönnum í Landssambandi lögreglumanna, Landssambanid slökkviliðs- og sjúkraflutningamanna og Tollvarðafélagi Íslands.

Á sama tímabili hækkaði kjararáð laun nokkurra forstjóra ríkisstofnana og biskups Íslands afturvirkt um allt að 20 prósent, vakti það mikla athygli í desember síðastliðnum þegar biskup fékk 18% afturvirka launahækkun frá 1. janúar 2017. Þetta þýðir að lögreglumaður með 500 þúsund krónur á mánuði fær 102 þúsund krónur í afturvirka hækkun frá 1.janúar 2017 en á sama tímabili fengu toppar ríkisstofnana milljónir í afturvirkar launahækkanir.

Samningarnir sem um ræðir eru hins vegar ekki kjarasamningar heldur launaþróunartrygging sem eiga að tryggja að opinberir starfsmenn sitji ekki eftir á meðan laun hækka á almennum vinnumarkaði. Elín Björg Jónsdóttir, formaður BSRB, segir jákvætt að tryggingin sé í höfn. „Ákvæðinu um launaþróunartryggingu er ætlað að tryggja okkar félagsmönnum að laun þeirra muni þróast á sama hátt og laun á almennum vinnumarkaði. Nú hækka launin hjá hluta af okkar fólki eftir fyrstu mælingu en svo verða gerðar tvær mælingar til viðbótar vegna áranna 2017 og 2018 sem geta haft áhrif á launin.“