Móðir fjögurra ára stúlku ákvað að bregðast skjótt við og taka dóttur sína úr leikskólanum eftir að stúlkan kom heim og sagði henni hvað á daga hennar hefði drifið í skólanum.
Málið hefur vakið athygli í Bretlandi, en það sem fór fyrir brjóstið á móðurinni, Ziba Khan, frá Leicester, var sú staðreynd að stúlkan hafði leikið sér með lítinn dúkkudreng sem var ekki í neinum fötum. Það sem fór einna mest fyrir brjóstið á henni var að kynfæri drengsins voru sýnileg.
Breska blaðið The Sun fjallar um málið og segir að Ziba hafi ákveðið að taka dóttur sína úr umræddum skóla, Forest Lodge Acedemy í Leicester. Þykir henni óviðeigandi að börn fái að leika sér með dúkkur líkt og um ræðir í þessari frétt.
„Dóttir mín kom heim og byrjaði að tala um typpi. Ég velti fyrir mér hvaðan í ósköpunum þetta kom. Elsta dóttir mín er kennari og hún hvatti mig til að spyrja skólann,“ segir Ziba. Hún gerði það og fékk þau skilaboð að skýringuna mætti líklega rekja til dúkkunnar sem börnin höfðu leikið með. „Ég get ekki séð að þessar dúkkur hafi eitthvað menntunar- eða þroskagildi fyrir fjögurra ára börn.“
Sjálf kveðst Ziba ekki vera á móti kynfræðslu í skólum – sé tilgangurinn sá – en umrædd dúkka hafi ekkert slíkt fræðslugildi. Hún segist hafa rætt málið við aðra foreldra og flestir séu á sama máli.
Ziba skrifaði bréf til skólayfirvalda þar sem hún hvatti þau til að skoða málið. Að hennar mati væri ekki tímabært að fjögurra ára börn skoði eða læri um kynfæri hins kynsins – hún hafi sjálf ætlað að gera það þegar rétti tíminn kæmi. Hún kveðst hafa talað fyrir daufum eyrum skólayfirvalda sem hafi ekki viljað taka dúkkuna úr notkun. Af þeim sökum ákvað hún að fara með dóttur sína í annan leikskóla.