Lögreglumenn hjá lögreglunni á höfuðborgarsvæðinu sem DV hefur rætt við segja að mikið skorti á að sú menntun sem boðið er upp á við HA uppfylli þær kröfur sem gera verði til starfandi lögreglumanna. Mikið vanti upp á starfsþjálfun og auk þess virðist nemarnir ekki fá nema sáralitla kennslu í LÖKE, tölvukerfi sem lögreglan notar gríðarlega mikið. Fyrstu nemarnir frá HA voru ráðnir til starfa á þessu ári og segja sumir reyndir lögreglumenn að þeir geti alveg eins verið einir að störfum eins og að hafa nýútskrifaða nema frá HA með sér. Kunnátta þeirra sé nær engin hvað varðar framkvæmd löggæslustarfa, skýrslugerð eða notkun LÖKE.
Vísir skýrði frá því í júní að óánægju gætti meðal nemanna sjálfra með námið og staðsetningu þess. Haft var eftir nokkrum nemendum að þeim þætti námið of þverfaglegt, uppbygging þess sé ekki nógu góð, fræðilegt vægi sé of mikið en verklegt nám fái lítið rými. Einnig nefndu nemarnir skort á kennslu í LÖKE til sögunnar. Einn sagði að í námið vantaði meiri reynslu og þekkingu frá sérfræðingum innan lögreglunnar til að hafa áhrif á og móta námið.
Nokkrir lögreglumenn hafa verið ráðnir til HA til að koma að náminu á einn eða annan hátt en reyndir lögreglumenn segja að það séu lögreglumenn með mjög litla reynslu og þeir hafi því ekki af miklu að miðla til nemanna.
Þá undrast reyndir lögreglumenn það námsefni sem boðið er upp á í HA. Þeir nefna þar til dæmis til sögunnar námskeið sem heita Inngangur að félagsvísindum, Félagsvísindatorg, Kenningar í félagsvísindum, Félagsgerð Íslands og Saga mannsandans. Lögreglumennirnir spyrja sig hvernig kennsla í þessum greinum eigi að undirbúa fólk undir að sinna löggæslustörfum.
Þegar Lögregluskólinn var lagður niður var stofnað Mennta- og starfsþróunarsetur lögreglunnar en það kemur lítillega að kennslu lögreglunemanna, annast þá litlu verklegu þjálfun sem þeir fá. Ef að markmiðið var að ná fram sparnaði með því að leggja Lögregluskólann niður þá hlýtur það að hafa mistekist því mun fleiri starfa við hið nýja Mennta- og starfsþróunarsetur en störfuðu við Lögregluskólann.
Það er þó rétt að hafa í huga að í Mennta- og starfsþróunarsetrinu fá starfandi lögreglumenn ýmsa fræðslu og kennslu en Lögregluskólinn sá um símenntun lögreglumanna áður.
Í samtali við DV segir Snorri Magnússon, formaður Landssambands lögreglumanna, að félagið hafi heyrt af þessari óánægju. Hann segir:
„Þetta er gjörbreytt landslag í kennslu frá því sem var. Áður kenndi lögreglan þetta sjálf í Lögregluskólanum og gat kennt allt viðkomandi starfinu. Það er ekki hægt í dag. Til dæmis kerfið okkar, LÖKE, sem verður aldrei opnað fyrir aðila utan lögreglu. Það verður aldrei hægt að kenna á þetta kerfi í háskóla, hver svo sem hann er. Það þyrfti einnig að endurskoða starfsnámið og lengja frá því sem var.“
Getur verið að áherslurnar í náminu sjálfu séu rangar?
„Það hefur legið fyrir frá því að farið var í þessa vegferð að það yrði breyting á náminu. Kennsla á háskólastigi er allt önnur en kennsla á framhaldsskólastigi, eins og var í Lögregluskólanum. Ég get ekkert mat lagt á það hvort að þessir tilteknu áfangar gagnist lögreglumönnum eða ekki enda ekki séð það nám sjálfur. En það er mín bjargfasta trú og skoðun að allt nám sé af hinu góða.“
Snorri segir að þegar Landssamband lögreglumanna beitti sér fyrir þessu hafi þeir séð fyrir sér annað fyrirkomulag heldur en varð ofan á.
„Við vildum hafa Lögregluskólann, í þeirri mynd sem hann var, áfram við lýði. En hann yrði þá felldur á einhvern hátt undir háskólasamfélagið. Það var ekki sú leið sem var farin. Eflaust má bæta hluti þarna án þess að ég geti bent á einn hlut umfram annan.“
Einnig nefnir Snorri að tímaramminn hafi verið ákaflega stuttur og Landssamband lögreglumanna hafi bent á það.
„Við töldum rétt að keyra Lögregluskólann áfram að minnsta kosti einu ári lengur en gert var, ef ekki tveimur, á meðan unnið væri að undirbúningi námsins á háskólastigi. En það var ekki tekið tillit til þess af stjórnvöldum.“
Eyjólfur Guðmundsson, rektor Háskólans á Akureyri, segir í samtali við DV að námið sé í mótun.
„Við höfum verið að þróa námið frá því að það hófst. Í þeirri þróun höfum við verið í virku samstarfi við lögregluháskóla í Noregi og Finnlandi, ásamt virku samstarfi við einstök embætti í Bretlandi. Námsefnið hefur því verið að þróast miðað við það sem gerist alþjóðlega enda er starf lögreglumannsins í dag mun flóknara en það var áður og þurfa starfandi lögreglumenn á nýrri þekkingu að halda. Ásamt því að sjálfsögðu að kunna vel tök á hefðbundnari lögreglustörfum. Hjá okkur á Íslandi er þessu þannig skipt að Háskólinn á Akureyri og Mennta- og starfsþróunarsetur lögreglunnar vinna í sameiningu að því að tvinna þessa tvo þætti saman.“
Að sögn Eyjólfs er námið síður en svo misheppnað.
„Við erum mjög ánægð með hvernig námið hefur þróast og þó svo að við höfum orðið vör við ýmislegt sem þyrfti að aðlaga eða breyta þá er það ekki umfram það sem vænta mátti í nýju námi. Þannig hefur til dæmis námskráin tekið breytingum frá fyrsta ári. Sum af þessum námskeiðum sem um er rætt eru ekki lengur þar inni en önnur komin inn.“
