Skólayfirvöld í Marion-sýslu í Flórída í Bandaríkjunum ákváðu fyrir skemmstu að nemendur í barnaskólum sýslunnar þyrftu ekki að vinna heimanám að skóladegi loknum.

Þessi ákvörðun hefur áhrif á fjölmörg börn í sýslunni, en ákvörðunin tekur til rúmlega þrjátíu skóla. „Börn læra ekki eins og þau gerðu áður,“ segir Keven Christian, yfirmaður hjá Marion County Schools sem sér um stefnumótun fyrir barnaskóla í sýslunni. Keven segir að tilgangslaust sé að láta börn hafa „þreytandi“ heimaverkefni til að vinna á kvöldin að loknum skóladegi.

Í staðinn fyrir heimavinnuna fara skólayfirvöld þess á leit að foreldrar lesi í tuttugu mínútur fyrir börn sín á hverju kvöldi. Börn geti valið sér bækur sem foreldrar síðan lesa fyrir þau.

Ákvörðunin hefur fallið vel í kramið hjá foreldrum barna í sýslunni og hjá börnunum sjálfum. Foreldrar fái þarna meiri tíma með börnunum sínum og börnin fái að auki meiri hvíld.

Hér á landi hefur umræðan um heimanám barna reglulega skotið upp kollinum. Árið 2013 vakti grein iðjuþjálfarans Sigurðar Hólm Gunnarssonar mikla athygli, en í henni sagði hann heimanám vera gagnslaust og skaðlegt börnum. Sigurður sagði meðal annars að ókostirnir við heimanám væru þeir að gæðastundum foreldra og barna fækkar. Í stað þess að gera eitthvað skemmtilegt saman eftir vinnu þurfa foreldrar að sjá til þess að börnin læri heima og það valdi togstreitu og pirringi milli foreldra og barna.