Ragnar Jónsson, rannsóknarlögreglumaður hjá tæknideild lögreglunnar á höfuðborgarsvæðinu, bar vitni nú á tólfta tímanum við aðalmeðferð í máli Thomas Møller Olsen, sem er sakaður um að hafa myrt Birnu Brjánsdóttur. Hann ræddi sérstaklega rannsókn lögreglu á blóðblettum í Kio Rio bifreiðinni.
„Bíllinn lýstist upp eftir lúmínól próf aftur í. Það var búið að þurrka yfir blóðið og því erfitt að rannsaka þetta. Blettirnir halda þó línulegri lögun sinni. Manneskjan fær tvö högg eftir að henni byrjar að blæða, en við erum ekki með heildarmynd af atburðinum,“ sagði Ragnar.
Hann sagði blóðið væri úr vitum en Birna var nefbrotin. „Það voru slettur í loftinu úr því sem slegið var með. Ef þú slærð niður í poll þá koma skvettur í línu upp í loftið þegar höndin eða hluturinn kemur aftur upp,“ sagði Ragnar.
Ragnar sagðist ekki geta sagt til um hvar brotaþoli og gerandi voru staddir í bílnum. „Það virðist vera meira hægra megin í bílnum. Mjög ólíklegt að Nikolaj hafi sloppið við bletti ef hann hefði setið í hægra framsæti. En ekkert fannst á honum,“ sagði Ragnar sem taldi að enginn hefði getað setið í ökumannssætinu heldur.
Verjandi Thomasar spurði hvort gerandi hefði ekki fengið blóð á hendur sínar og sagði Ragnar það líklegt. Verjandi spurði þá hvort blóð hafi fundist á stýrinu eða gírstöng. Ragnar sagðist ekki muna til þess.