Flestir sjómenn sem tjá sig í lokuðum hópi sjómanna á Facebook eru á því máli að það sé skammarleg framkoma að það hafi verið málað yfir sjómanninn á Sjávarútvegshúsinu. Sjómennirnir segja meðal annars að þetta sýni lítilsvirðingu við sjómenn og lýsi fordómum yfirstéttar.
Fréttablaðið greindi fyrst frá því að málað hafi verið yfir listaverkið og RÚV bætti við þá frétt í gær með því að greina frá því að Hjörleifur Guttormsson, fyrrverandi ráðherra og þingmaður Alþýðubandalagsins á Austurlandi, hafi raunar verið í herferð gegn sjómanninum. Myndin hafði prýtt Sjávarútvegshúsið við Skúlagötu í nærri tvö ár.
Þórólfur Júlían Dagsson, sjómaður og Pírati ásamt öðru, spurði sjómenn álits innan hóps sjómanna á Facebook um hvað þeim þætti um að það hafi verið málað yfir listaverkið. „Ömurlegt og ástæðan sögð kvartanir úr Skuggahverfinu. Er þetta ekki nógu fínt fyrir „skánina“?,“ spurði einn sjómaður og vísaði þar til yfirstéttar sem býr í dýrum íbúðum hverfisins.
Annar sagði þetta lýsandi: „Þetta er bara enn eitt dæmið um lítilsvirðinguna og fyrirlitninguna sem sjómannastéttinni er sýnd. Sjómenn eiga bara að vera ósýnilegir þrælar stórútgerðarinnar með engin réttindi önnur en að borga kostnaðinn af útgerðinni með hluta aflans. Að svona skuli komið fyrir sjómönnum á Íslandi af öllum löndum er grátlegt og sannarlega hneyksli því sannarlega voru það sjómenn sem byggðu undirstöður þess velferðarþjóðfélags sem við búum í í dag.“ Sá þriðji spurði einfaldlega hvaða hryðjuverk ætli komi í staðinn: „Kannski áttaviti fyrir túrista“.
Líkt og RÚV greindi frá í gær þá fór myndin „mikið fyrir brjóstið“ á Hjörleifi. Hann sendi fjölda tölvupósta á byggingafulltrúa Reykjavíkurborgar og fleiri. Svo mikið barðist Hjörleifur fyrir því að myndin yrði fjarlægð að hann hafði samband við húsvörð Sjávarútvegshússins.
Í samtali við DV segir Þórólfur Júlían að Hjörleifur Guttormsson ætti að skammast sín fyrir að hafa lagt svo mikla áherslu á að listaverkið yrði fjarlægt. „Hann ætti að skammast sín. Þetta er honum ekki til framdráttar. Ég er nokkuð viss um að sjómenn fyrir austan eru ekki ánægðir með fyrrum ráðherra. Sjómennskan er arfleið okkar og við eigum að vera stolt af henni,“ segir Þórólfur Júlían.