Lögreglan á höfuðborgarsvæðinu og Europol óska eftir aðstoð almennings við að greina hluti og staði á ljósmyndum sem eru tengdar barnaklámi.
Lögreglan deilir hlekk á vef Europol en þar má sjá myndir af hinum ýmsu hlutum svo sem tuskudýrum og barnafötum. Ef viðkomandi kannast við einhvern þessara hluta þá er hann beðinn um að skrá í hvaða landi hluturinn megi finnast. Þannig getur lögreglan áttað sig betur á því í hvaða landi líklegast er að myndin hafi verið tekin.
„Evrópulögreglan – Europol – biður almenning um aðstoð við að greina muni og / eða staði í meðfylgjandi hlekk. Vinsamlegast fylgið leiðbeiningum á síðunni ef þið teljið ykkur hafa eitthvað fram að færa,“ skrifar Lögreglan á höfuðborgarsvæðinu á Facebook.
