Skólastjóra og starfsmanni vikið ótímabundið frá störfum – Grunur um ofbeldi á hendur minnst fjórum drengjum
Barnavernd rannsakar nú mál sem komið hefur upp á Barnaskóla Hjallastefnunnar í Reykjavík þar sem skólastjóri og starfsmaður eru grunaðir um að hafa beitt börn ofbeldi. Ofbeldið á að hafa átt sér stað í einhvern tíma. Margrét Pála Ólafsdóttir fulltrúi Hjallastefnunnar segir í samtali við fréttir Stöðvar 2 í kvöld að málið sé mikið áfall fyrir starfsmenn skólans.
Skólastjóranum og starfsmanninum hefur báðum verið vikið ótímabundið frá störfum. Umræddur starfsmaður hefur starfað sem stuðningsfulltrúi í hópi 9 ára drengja i skólanum.
Fram kemur að fyrir tveimur vikum hafi forsvarsmönnum Hjallastefnunnar borist tilkynning frá foreldri barns í skólanum þar sem fram kom að starfsmaður hefði beitt barnið ofbeldi. Í kjölfarið hafi komið í ljós að um fleiri tilvik væri hugsanlega að ræða. Grunur leikur á að minnst fjórir drengir hafi verið beittir ofbeldi.
„Þetta snýst um án efa meira en eitt. Eitt foreldri sem hefur látið barnaverndarnefnd vita og óskað eftir könnun,“ segir Margrét Pála í samtali við Stöð 2 og bætti við að hún hefði þó ekki fengið beinar upplýsingar um málið frá barnaverndarnefnd. Þá tók hún jafnframt fram að ekki sé um kynferðisofbeldi að ræða.