Ölgerðin kaupir Kú

Mun áfram starfa með Kú mjólkurbúi.
Ólafur Magnússon Mun áfram starfa með Kú mjólkurbúi.
Mynd: Skjáskot af vef Ríkisútvarpsins.

Ölgerðin Egill Skallagrímsson hefur fest kaup á Kú mjólkurbúi. Þetta kemur fram í tilkynningu sem Ölgerðin sendi frá sér en þar segir enn fremur að með kaupunum styrkist staða Kú á mjólkurmarkaði til muna.

„Kú hefur verið ötull frumkvöðull frá stofnun og barist af einurð og afli gegn fákeppni á mjólkurmarkaði. Með kaupum Ölgerðarinnar eykst sá slagkraftur án þess þó að að breyta frumkvöðlahugsjón fyrirtækisins þar sem hagur neytenda og framsýni ræður ríkjum,“ segir Októ Einarsson, stjórnarformaður, í tilkynningunni.

Kú mjólkurbú var stofnað árið 2009 og hófst framleiðsla ári síðar. „Við höfum lent í ýmsu og það hefur ekki alltaf verið auðvelt að berjast á þeim fákeppnismarkaði sem ríkt hefur. Stuðningur Ölgerðarinnar styrkir okkur í þeirri baráttu sem framundan er og hleypir nýjum krafti í okkur,“ segir Ólafur Magnússon í tilkynningunni, en hann mun starfa áfram með Kú mjólkurbúi.

Í tilkynningunni segir enn fremur að fjöldi nýjunga frá Kú mjólkurbúi verði kynntar verða á næstu mánuðum.
„Það eru spennandi tímar framundan og ég hlakka til að sjá öflugri Kú takast á við þá ójöfnu samkeppni sem ríkt hefur. Neytendur verða sem fyrr í fyrsta sæti hjá Kú mjólkurbúi,“ segir Guðni Þór Sigurjónsson, framkvæmdastjóri.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.