Hinn grunaði býr ekki á höfuðborgarsvæðinu
Lögreglan á höfuðborgarsvæðinu fór í dag fram á vikulangt gæsluvarðhald yfir manninum sem grunaður er um að hafa stungið karlmann á fertugsaldri fyrir utan skyndibitastaðinn Metro á Smáratorgi í Kópavogi í gærkvöldi. Þetta staðfestir Grímur Grímsson, yfirlögregluþjónn í samtali við RÚV. Félaga mannsins, sem var viðstaddur árásina, var sleppt
Fram kemur í frétt RÚV að árásarmaðurinn búi úti á landi.
Lögreglan vinnur nú hörðum höndum að rannsókn málsins. Tekin var skýrsla af hinum grunaða í dag auk þess sem rætt hefur verið við hugsanleg vitni. Þá er verið að skoða hvort að árásin hafi náðst á nærliggjandi eftirlitsmyndavélar.
Eins og DV greindi frá í morgun þá var árásin með öllu tilefnislaus. Ekkert hefur komið fram í dag sem hrekur þá fullyrðingu.
Fórnarlambið var úti að borða með unnustu sinni og tveimur stjúpbörnum. Hann lauk máltíð sinni á undan öðrum fjölskyldumeðlimum. Hann gekk þá út til þess að fá sér sígarettu en þar rakst hann á mennina tvo, sem eru á tvítugsaldri. Til orðaskipta kom á milli þeirra sem leiddi til þess að maðurinn var stunginn í bakið.
Samkvæmt heimildum DV er fórnarlambið á batavegi.