Konan, Shruti Basappa, býr hérlendis ásamt íslenskum eiginmanni sínum
Mál indverskrar konu, sem er gift íslenskum manni og er búsett hérlendis, hefur vakið mikla athygli og reiði á Indlandi. Konan, sem heitir Shruti Basappa, var stödd á flugvellinum í Frankfurt þegar hún var tekin afsíðis af öryggisvörðum. Kröfðust þeir þess að hún myndi lyfta upp kjól sínum til þess að þeir gætu gengið úr skugga um að konan leyndi ekki neinu undir kjólnum. RÚV greinir frá.
Fram kemur að Shruti hafi verið á leiðinni til Íslands frá Indlandi ásamt eiginmanni sínum, Eini Hlé Einarssyni og fjögurra ára dóttur þeirra. Shruti skrifaði um reynslu sína á Facebook-síðu sína þar sem hún greindi frá því að hún væri alltaf tekin í öryggisleit á flugvöllum. Velti hún því upp að líklega væri það útaf húðlit hennar því að eiginmaður hennar væri aldrei stoppaður þegar þau ferðuðust saman.
Indverskir fjölmiðlar hafa fjallað ítarlega um málið. Í umfjöllun NDTV sjónvarpstöðvarinnar í Nýju Delhi kemur fram að Shruti hafi sent formlega kvörtun til flugvallarins og þá hafi Sushma Swaraj, utanríkisráðherra Indlands, óskað eftir skýrslu frá konsúlnum í Frankfurt um atvikið.