Bæjarstjórn Reykjanesbæjar vill fá innanlandsflugið til bæjarins og skoðað verði kostir þess að innanlandsflugið fari til Keflavíkurflugvallar. Í ályktun bæjarstjórnar segir að sá möguleiki sem helst hafi verið skoðaður til að taka við af Reykjavíkurflugvelli sé Hvassahraun sem sé aðeins í 20 mínútna fjarlægð frá Keflavíkurflugvelli. Um Hvassahraun segir bæjarstjórnin:
„Það er ljóst að verði af slíkri framkvæmd mun hún kosta tugi milljarða. Það getur varla talist réttlætanlegt þegar hægt væri að koma upp aðstöðu fyrir innanlandsflug fyrir brot af þessum kostnaði.“
Segir að kostirnir við innanlandsflugið séu augljósir út frá fjárhagslegum sjónarmiðum. Þá sé sjúkrahús á Suðurnesjum sem geti sinnt ákveðnum hluta sjúkraflugs með litlum breytingum.
„Á það hefur verið bent að dreifa þurfi ferðamönnum um landið vegna átroðnings á ákveðnum stöðum. Með tengingu innanlandsflugs og millilandaflugs verður slíkt mögulegt í auknum mæli.“
Þau sem skora á að innanlandsflugið fari til Keflavíkur eru:
„Guðbrandur Einarsson, Böðvar Jónsson, Magnea Guðmundsdóttir, Gunnar Þórarinsson, Kristján Jóhannsson, Friðjón Einarsson, Eysteinn Eyjólfsson, Kristinn Þór Jakobsson, Davíð Páll Viðarsson, Ingigerður Sæmundsdóttir og Baldur Þ. Guðmundsson.“