Í gærkvöldi barst lögreglu tilkynning um ölvað par sem var til vandræða við veitingastað í Bankastræti þar sem þau höfðu ráðist á dyravörð. Konunni hafði verið vísað út af veitingastaðnum eftir að hún fór að afklæðast þar inni.

Þegar dyraverðir voru að fylgja konunni út þá sló hún dyravörð en maðurinn mun hafa sparkað í dyravörðinn.

Á vettvangi sló konan einnig lögreglumann með krepptum hnefa í andlitið. Þá var ekki farið að fyrirmælum lögreglu á vettvangi og hafði parið í hótunum við lögreglumenn varðandi að skaða lögreglumenn síðar og fjölskyldur þeirra. Parið var vistað í fangageymslu lögreglu fyrir rannsókn máls.

600 þúsund króna myndavél stolið

Þá var tilkynnt um innbrot í bifreið á bifreiðastæði við Perluna. Erlent par ( ferðamenn ), höfðu verið sofandi í bílaleigubílnum sínum á bifreiðastæði við Perluna þegar þau vakna við að hliðarrúða, ökumanns, er brotin og maður teygir sig í aftursætið og tekur þaðan 600.000 króna myndavél í myndavélatösku.

Maðurinn sest síðan upp í aðra bifreið og ekur í burt. Ferðamennirnir fljúga frá Íslandi næstkomandi laugardag eftir 11 daga ferðalag um Ísland. Myndavélin er ótryggð og þau eru með 350.000 króna sjálfsábyrgð á bílaleigubifreiðinni. Þó fannst þeim verst að hafa misst allar ljósmyndirnar úr ferðinni sem voru í myndavélinni.