Sjö málverkum eftir listakonuna var stolið úr geymslu um jólin
„Málverkin eru okkur mjög kær og við vonum að sú ákvörðun okkar að bjóða fundarlaun leiði til þess að við endurheimtum verkin,“ segir Stephen Lárus Stephen, sonur listakonunnar Karólínu Lárusdóttur, í samtali við Morgunblaðið í dag.
Um jólin var sjö málverkum, sem Karólína hafði unnið að, stolið úr geymslu við Vatnsstíg í Reykjavík, en talið er að verkunum hafi verið stolið á tímabilinu 23. til 28. desember. Verkin voru ókláruð en í frétt RÚV í byrjun janúar kom fram að innbrotsþjófarnir hafi brotið upp hurð og virst hafa borið sig fagmannlega að við þjófnaðinn.
Stephen sagði við RÚV að svo virðist vera sem þjófurinn eða þjófarnir hafi eingöngu haft áhuga á verkum Karólínu. Þannig hafi þeir ekki litið við öðrum verðmætum sem voru í geymslunni.
Í frétt Morgunblaðsins í dag kemur fram að fjölskylda Karólínu hafi ákveðið að bjóða 500 þúsund krónur í verðlaun sem leiða til þess að verkin endurheimtist.
Karólína hafði unnið að verkunum þegar hún fékk heilablóðfall árið 2013, en hún hefur verið óvinnufær síðan. Verkin eru ómerkt og ókláruð.
Í frétt RÚV í janúar kom fram að eitt verkanna hafi sýnt barnabörn Karólínu og því hafi verkin ákveðin tilfinningagildi. Stephen segir í Morgunblaðinu í dag margar vísbendingar hefðu borist en þrátt fyrir það hefðu verkin ekki fundist.