Um ellefuleytið í morgun var tilkynnt um eld í bíl í miðbænum. Lögregla og slökkvilið voru send á vettvang og var eldurinn slökktur fljótlega. Bíllinn er hins vegar nokkuð skemmdur. Ekki er talið að um íkveikju hafi verið að ræða.
Þetta kemur fram í dagbók lögreglunnar. Þar segir einnig frá því að laust eftir klukkan tvö í dag var tilkynnt um nokkur ungmenni sem voru komin út á íshellu sem lá yfir hluta Lækjarins í Hafnarfirði en ísinn var ekki talinn traustur. Lögreglan fór á vettvang og ræddi við ungmennin og gerði þeim grein fyrir hættunni sem getur stafað af þessu.
Í hádeginu slógust tveir karlmenn fyrir utan matvöruverslun í Kópavogi. Lögreglan fór á vettvang og ræddi við málsaðila en til einhverra orðaskipta hafði komið á milli þeirra inni í versluninni með þeim afleiðingum að þeir fóru að slást.
Upp úr klukkan þrjú var tilkynnt um börn að leik á íshellu á Rauðavatni. Lögreglan fór á vettvang og voru þar bæði börn og fullorðnir að leik. Ísinn var talinn traustur og því ekki ástæða til frekari aðgerða en áréttað var fyrir fólki að fara varlega.