„Jæja, Hamborgarafabrikka. Eruð þið ekki örugglega að hanna einhvern geggjaðan Söruborgara? Annan Fyrirliða? Eða verður Mettan látin metta lýðinn? Það er alveg smá pláss á matseðlinum ykkar fyrir annað en borgara til heiðurs körlum,” skrifar Ragnhildur Sverrisdóttir á Facebook-síðu sína í kjölfar stórkostlegs sigurs kvennalandsliðsins í knattspyrnu gegn Þýskalandi á föstudag.
Ragnhildur er fyrrverandi blaðamaður, talskona Björgólfs Thors Björgólfssonar athafnamanns og eiginkona Hönnu Katrínar Friðrikssons, þingkonu Viðreisnar.
Töluverð umræða spratt upp í vetur um skort á kvenkenndum réttum á Fabrikkunni og lögðu þá margir orð í belg. Sumum fannst þetta vera dæmigert fyrir ríkjandi karllæg sjónarmið í samfélaginu en aðrir sögðu að þetta væri glatað málefni í jafnréttisbaráttu því hvaða kona vildi láta kenna sig við hamborgara?
Í ummælum undir stöðufærslu sinni skrifar Ragnhildur:
„Pointið er, að Hamborgarafabrikkunni finnst augljóslega upphefð í þessu og því stingur það í augun að þar miðist allt við einhverja karlaborgara – fyrir utan „Ungfrú Reykjavik“ sem er auðvitað nafnlaus að öðru leyti. Svona staður ætti að sjá sóma sinn í að finna a.m.k. eina (Dag)nýja hamborgarauppskrift.“
Núna er spurning hvort Hamborgarafabrikkan taki við sér og við sjáum nýja rétti kennda við skörunga kvennaknattspyrnunnar.
