Aðeins munaði tveimur dögum að 68 ára karlmaður í New Jersey í Bandaríkjunum, Jimmie Smith, missti af 24 milljóna dala lottóvinningi. Jimmie vann þann stóra, 2,4 milljarða króna, í útdrætti í maí árið 2016 en áttaði sig ekki á því fyrr en tæpu ári síðar.

Lögum samkvæmt hafa vinningshafar tólf mánuði til að vitja vinninganna sem bíða. Í útdrættinum þann 25. maí í fyrra var Jimmie með allar tölurnar réttar: 05, 12, 13, 22, 25 og 35. Hann hafði vanið sig á að geyma lottómiðana á einum stað í gamalli skyrtu sem hékk inni í skáp hjá honum.

Eitthvað varð til þess að Jimme gleymdi að kíkja á vinningsmiðann og sat miðinn því sem fastast í skyrtunni og safnaði ryki. Það var svo dag einn í vor að hann sá frétt þess efnis að enn ætti vinningshafi úr útdrættinum í maí 2016 eftir að koma fram. Var fólk hvatt til að athuga hvort vinningsmiðinn leyndist einhversstaðar.

Jimme ákvað í kjölfarið að gá í skyrtuna og þá komst hann að því að hann hefði unnið þann stóra. Þetta var þann 23. maí síðastliðinn, eða tveimur dögum áður en fresturinn rann út.

Smith er sem fyrr segir orðinn 68 ára og valdi hann að fá vinninginn greiddan út í áföngum á næstu 26 árum.