Lögreglan á Íslandi hefur lokið störfum um borð í togaranum Polar Nanoq og gera áætlanir ráð fyrir að skipið láti bráðlega úr höfn. Tveir skipverjar Polar Nanoq eru í haldi lögreglu á Íslandi grunaðir um saknæmt athæfi í tengslum við lát Birnu Brjánsdóttur. Þá er annar þeirra grunaður um smygl á umtalsverðu magni af hassi.

Stórum hluta áhafnarinnar hefur verið skipt út, en hluti skipverja kaus að snúa aftur heim í stað þess að halda aftur á sjó. Áhöfnin er þakklát fyrir stuðning sem hún fékk í erfiðum aðstæðum á Íslandi.

Rannsókn lögreglu á láti Birnu og fíkniefnafundinum um borð í skipinu heldur áfram en fram kemur í tilkynningu frá Polar Seafood að útgerðin sé yfirvöldum til reiðu um hvers konar aðstoð eða upplýsingar vegna rannsóknanna.

„Atburðir síðustu daga hafa lagst þungt á áhöfn Polar Nanoq og aðra hjá Polar Seafood. Um leið getur útgerðin ekki borið ábyrgð á framferði og ákvörðunum einstaklinga sem ráða sig til starfa hjá því. Allir hjá Polar Seafood eru harmi slegnir yfir atburðum og fregnum síðustu daga og votta fjölskyldu og vinum Birnu Brjánsdóttur innilega samúð sína.
Við hjá Polar Seafood erum þakklát fyrir alla aðstoð á Íslandi á þessum erfiðu stundum,“

segir jafnframt í tilkynningunni og leið útgerðin kemur á framfæri sérstökum þökkum til stjórnvalda, utanríkisráðuneytis, lögreglu, danska sendiráðsins og sjálfboðaliða hjá björgunarsveitum landsins.