Ungversk kona, Petra Laszlo, sem komst í heimsfréttirnar árið 2015 þegar hún sást bregða fæti fyrir flóttamenn, hefur verið dæmd í þriggja ára skilorðsbundið fangelsi.

Myndband af atvikinu vakti heimsathygli en atburðurinn átti sér stað við landamæri Ungverjalands og Serbíu. Flóttamenn höfðu ruðst í gegnum girðingu á landamærunum og voru að flýja undan laganna vörðum þegar Petra brá fæti fyrir mann sem var á hlaupum með ungt barn í fanginu. Þá virtist hún sparka í unga stúlku.

Petra segir að dómnum verði áfrýjað.

Fyrir dómi sagðist hún hafa talið sig vera í hættu og hún hefði gripið til þessa ráðs til að verja sig. „Ég snéri mér við og á hundruð manna hlaupa í áttina að mér. Ég var mjög hrædd,“ sagði hún og bætti við að eftir að atvikið kom upp hafi líf hennar verið erfitt. Henni var sagt upp störfum hjá N1TV-sjónvarpsstöðinni eftir að myndbandið komst í hámæli og sagði að sér hefðu borist líflátshótanir.

Dómari í málinu tók ekki tillit til þessara útskýringa og sagði að hegðun hennar hefði gengið gegn samfélagslegum gildum og taldi rétt að dæma hana í þriggja ára fangelsi. Petra þarf þó ekki að sitja inni nema hún rjúfi skilorð.