Breski milljarðamæringurinn Jim Ratcliffe ásælist mjög jarðir sem eiga hlut í laxveiðiánni Hafralónsá í Þistilfirði. Heimamenn segja að tilraunir hans til að kaupa jarðir – stundum fyrir háar fjárhæðir – hafi þegar leitt til deilumála innan sveitarinnar og jafnvel innan fjölskyldna, þar sem deildar meiningar eru um það hvort ganga eigi að tilboðum hans.

Frá þessu er greint í Fréttablaðinu. Téður Ratcliffe keypti stóran hluta jarðar Grímsstaða á Fjöllum. Áður hafði hann keypt jarðir í Vopnafirði. Að sögn eru umhverfismál og verndun laxastofnsins honum huglekin. „Ég set stórt spurningamerki við aðferðir þessara ágengu fjárfesta, sem augljóslega eru að reyna að ná Hafralónsá,“ er haft eftir Maríu Jónsdóttur, hluthafa í jörðinni Hvammi við Hafralónsá. Annar landeigandi segir mennina fara hamförum en Lögmannsstofan Sókn á Egilsstöðum hefur haft milligöngu um kaupin.

Í blaðinu kemur fram að einhverjar jarðir í Þistilfirði hafi verið seldar og aðrar séu í söluferli.