Landvernd hefur hafið undirskriftasöfnun á heimasíðu samtakanna í þeirri von að Alþingi samþykki ekki frumvarp Ragnheiðar Elínar Árnadóttur, iðnaðar- og viðskiptaráðherra, sem heimilar Landsneti að leggja raflínur frá Þeistareykjavirkjun að iðnaðarsvæðinu á Bakka við Húsavík.

Alls höfðu 1.230 manns skrifað undir áskorun samtakanna þegar DV fór í prentun í gær. Landvernd kærði útgáfu framkvæmdaleyfa Þingeyjarsveitar og Skútustaðahrepps fyrir raflínunum til úrskurðarnefndar umhverfis- og auðlindamála. Verði frumvarp iðnaðarráðherra að lögum verða leyfin gerð ógild og þar með mun nefndin ekki fjalla áfram um málið. Í staðinn verður nýtt framkvæmdaleyfi sett inn í lögin og ekki verður hægt að kæra það til nefndarinnar.

„Þetta felur í sér grafalvarleg pólitísk afskipti framkvæmdavaldsins af störfum óháðrar úrskurðarnefndar. Spyrja má hvort stjórnvöld myndu grípa inn í störf dómstóla með sama hætti. Þessi gjörningur er aðför að réttarkerfinu, þrískiptingu valds og réttlátri málsmeðferð,“ segir á heimasíðu Landverndar.