Tuttugu og fimm ár eru síðan Eystrasaltslöndin þrjú endurheimtu sjálfstæði sitt og þess er minnst með málþingi í Norræna húsinu næstkomandi mánudag. Lilja Alfreðsdóttir utanríkisráðherra flytur opnunarávarp og situr pallborðsumræður með utanríkisráðherrum Eistlands, Litháens og Lettlands síðar um daginn. Forseti Íslands, Guðni Th. Jóhannesson, flytur inngangsávarp en hann hefur reglulega drepið niður penna um lofsvert hlutverk Íslendinga, undir forystu Jóns Baldvins Hannibalssonar, í sjálfstæðisbaráttu landanna.

Það vekur því óneitanlega nokkra eftirtekt að nafn Jóns Baldvins er hvergi að sjá á meðal þeirra sem ávarpa málþingið. „Ég vissi ekki af þessu þingi og get staðfest að enginn hefur boðið mér þátttöku,“ segir Jón Baldvin í samtali við DV. „Ég er staddur á flugvelli í Andalúsíu-héraði og er á heimleið til þess að taka þátt í hátíðarfundi á Ísafirði í tilefni þess að 100 ár eru frá stofnun Alþýðuflokksins. Sá fundur fer fram um helgina,“ segir Jón Baldvin. Hann vildi ekki segja skoðun sína á því að honum hefði ekki verið boðin þátttaka í málþinginu.

Jón Baldvin heimsótti nýlega málþing í Lettlandi og Litháen í tengslum við tímamótin. Í Riga sat hann hringborðsumræður þar sem farið var yfir ávinning Eystrasaltsríkja og Norðurlandanna af samstarfinu. „Í fyrri viku var ég meðal framsögumanna á tveggja daga ráðstefnu í Vilníus sem utanríkisráðherra Litháens boðaði til. Þar var rætt um framtíð Evrópu til hliðsjónar af 25 ára reynslu Eystrasaltsríkjanna af sjálfstæði og þar var ég á meðal framsögumanna. Þar um slóðir er því leitað til mín,“ segir Jón Baldvin kankvís. Aðspurður hvort að hann hygðist mæta á málþingið og hlýða þar á erindi fundarmanna segir Jón Baldvin: „Nei, það mun ég ekki gera. Mér er ekki boðið.“