Fjöldi manns fékk í morgun tölvupóst frá Húð- og kynsjúkdómadeild Landspítalans, þar sem þeim var tjáð að niðurstöður úr rannsókn frá Húð- og kynsjúkdómadeild Landspítalans muni berast innan viku til tíu daga.

Pjatt.is greindi fyrst frá málinu, en þar segir að síminn hjá Landsspítalanum hafi logað í morgun þar sem ótal viðtakendur hafi hringt í morgun og ekki kannast við að hafa farið í rannsókn á þessari deild síðustu vikur eða ár.

Póstur barst frá netfanginu kyn@landspitali,is, en allir þeir sem gefið hafa upp netfang hjá Húð- og kynsjúkdómadeild Landspítalans fengu póstinn, að því er fram kemur á Pjatt.is. Meðfylgjandi skjáskot er af póstinum sem sendur var í morgun.

Í samtali við DV segir Guðný Helga Herbertsdóttir, deildarstjóri Samskiptadeildar Landspítalans, að um hafi verið að ræða bilun í pósthólfi þessa tiltekna netfangs.

„Við sendum aldrei út neinar rannsóknarniðurstöður á tölvupósti. Við munum strax skoða hvað það er sem farið hafi úrskeiðis,“ segir Guðný Helga, sem ekki getur staðfest hversu margir hafi fengið tölvupóstinn.

Aðspurð hvort brotist hafi verið inn í tölvukerfi spítalans segir hún ekki vera útlit fyrir það og að bilunin hafi gert það að verkum að einhverjir sem sent hafi fyrirspurn á netfangið kyn@landspitali.is, hafi fengið sjálfvirka svarið sent, þrátt fyrir að hafa ekki sent nýlega inn fyrirspurn.