Góðar veðurhorfur hafa orðið til þess að aukinn fjöldi flóttamanna leggur af stað í hættuför frá Afríku til Evrópu. Talið er að um 700 flóttamenn hafi drukknað í röð sjóslysa við strendur Líbýu síðustu daga.
Samkvæmt heimildum BBC er hundrað flóttamanna saknað úr báti sem hvolfdi á miðvikudaginn. 550 er saknað úr báti sem hvolfdi á fimmtudagsmorgun, daginn eftir að honum var siglt úr höfn í Líbýu. Þeir sem komust lífs af segja enga vél hafa verið í bátnum heldur hafi annað skip verið með bátinn í eftirdragi. Þriðja sjóslysið átti sér stað á föstudag, þar sem 135 manns var bjargað og 45 lík voru dregin upp úr sjónum. Fjölda fólks er enn saknað.
Verið er að flytja þá sem komust lífs af í höfn í Taranto og Pozzallo á Ítalíu. Yfirvöld þar í landi telja að alls hafi 13 þúsund flóttamönnum verið bjargað úr sjónum í vikunni sem leið. Sameiginlegur skipsfloti fjölda þjóða stendur nú að björgunaraðgerðum í Miðjarðarhafinu. Aðstæður eru mjög erfiðar og manntjón mikið sökum þess fjölda illa útbúinna skipa sem siglt hafa af stað samtímis.
