Dýraverndunarsamtök hafa birt myndband af augnablikinu þegar 156 hundar sáu dagsins ljós í fyrsta skipti. Hundunum hafði verið haldið í litlum búrum nær allt sitt líf og notaðir sem tilraunadýr fyrir snyrtivöruframleiðendur.

Hundarnir, sem flestir eru á aldrinum tveggja til fimm ára, bjuggu á tilraunastofu í borginni Bangalore á Indlandi. Það voru fulltrúar dýraverndunarsamtakanna Compassion Unlimited Plus Action sem lögðu hönd á plóginn við að frelsa dýrin úr þessum miður skemmtilegu aðstæðum.

Óhætt er að segja að líf hundanna hafi breyst þann 16. maí síðastliðinn þegar yfirvöld í Bangalore höfnuðu beiðni forsvarsmanna tilraunastofunnar um að nota hundana áfram sem tilraunadýr og fyrirskipuðu að þeim skyldi sleppt. Dýraverndunarsamtökin höfðu barist fyrir því um nokkurt skeið að starfsemin yrði stöðvuð enda var velferð dýranna ekki beint höfð að leiðarljósi á umræddri tilraunastofu.

Forsvarsmenn samtakanna hafa undanfarna daga unnið að því að finna ný heimili fyrir hundana en áður en að því kemur munu sjö sjálfboðaliðar samtakanna þjálfa hundana til að gera þá reiðubúna fyrir hið venjulega líf og að umgangast og treysta fólki.

„Sumir eru enn varir um sig í kringum fólk. Þegar þeim var sleppt var augljóst að sumir voru hræddir, þeir höfðu aldrei litið dagsins ljós og þeirra heimur var mjög lítill. Sumir áttu erfitt með að ganga og hlaupa þar sem þeir höfðu aldrei gert það á meðan aðrir leituðu í skuggann og urðu smeykir þegar einhver nálgaðist þá,“ segir Chinthana Gopinath, sjálfboðaliði hjá samtökunum.