Allar björgunarsveitir fyrir austan fjall voru kallaðar út á áttunda tímanum í gærkvöldi þegar þyrla, með Ólaf Ólafsson, aðaleiganda Samskipa brotlenti suður af Nesjavallavirkjun. Með í för voru viðskiptafélagar Ólafs auk þyrluflugmanns. Mikill viðbúnaður var vegna slyssins og var fjöldi sjúkrabíla kallaður á vettvang.
Tilkynning barst um slysið klukkan 19.45 í gærkvöld. Slysstaður reyndist vera um 2,5 kílómetra suður af Nesjavallavirkjun og reyndust meiðsl þeirra fimm sem í þyrlunni vera minniháttar. Þeir voru allir fluttir í einni ferð með vél gæslunnar á slysadeild í Reykjavík. Þyrlan er mikið skemmd en í frétt Morgunblaðsins segir að Ólafur sé eigandi þyrlunnar.
Ólafur hefur sent frá sér yfirlýsingu vegna málsins.
„Eins og fram hefur komið í fjölmiðlum var ég farþegi í þyrlu sem lenti í óhappi á Hengilssvæðinu suður af Nesjavallavirkjun fyrr í kvöld. Mikilvægast er að allir sluppu tiltölulega vel frá þessu atviki miðað við aðstæður og fyrir það erum við þakklát. Fyrir hönd okkar vil ég þakka öllum hlutaðeigandi, þar með talið björgunarfólki og starfsfólki Landspítalans, fyrir skjót viðbrögð og faglega ummönnun.“
Þá segir Ólafur ennfremur:
,,Í þyrlunni voru þrír viðskipafélagar mínir frá Norðurlöndunum og íslenskur flugmaður. Um var að ræða útsýnisflug með erlendu gestina og ætlunin var að lenda aftur í Reykjavík.“