Farþegafjöldi WOW air eykst um 164% í nóvember
WOW air flutti 149.495 farþega til og frá landinu í nóvember eða um 164% fleiri farþega en í nóvember árið 2015. Þá var sætanýting WOW air 87% í nóvember í ár sem er sú sama og á síðasta ári, þrátt fyrir 164% aukningu á sætaframboði í nóvember. Framboðnum sætiskílómetrum fjölgaði um 215% í nóvember frá því á sama tíma í fyrra.
Það sem af er árinu hefur WOW air flutt um 1.502 þúsund farþega en það er 125% aukning farþega á sama tímabili frá árinu áður.
Nóvembermánuður er alltaf að verða vinsælli ferðamánuður meðal ferðamanna sem koma til Íslands. Samkvæmt Ferðamálastofu hefur fjöldi ferðamanna ríflega sexfaldast frá árinu 2010. Aldrei hafa fleiri ferðamenn flogið með WOW air til Íslands í nóvember
en 164% fleiri flugu með flugfélaginu í síðasta mánuði en árið áður.
Af þeim þjóðum sem komu til landsins í nóvember eru Bretar fjölmennastir eða 27,8% af heildarfjölda en fast á eftir fylgdu Bandaríkjamenn sem voru 23,2% af heildarfjölda.
WOW air flýgur til London, Edinborgar og Bristol í Bretlandi allan ársins hring. Félagið hóf áætlunarflug til New York í lok nóvember og flýgur nú til fimm áfangastaða í Bandaríkjunum.
Á næsta ári munu svo bætast við leiðarkerfið; Miami í apríl og Pittsburgh í júní. Flogið er allan ársins hring til allra áfangastaða WOW air í Bandaríkjunum.